WATU 140 WAUAWA KATIKA MAPIGANO YA SERIKALI NA WAPINZANI

Shirika la Haki za Binadamu la Human Rights Watch limetangaza kuwa, watu wasiopungua 140 wameuawa wakati vikosi vya serikali ya Ethiopia vilipokuwa vinakabiliana na malalamiko ya wapinzani wa serikali.

Machafuko hayo yamezuka baada ya serikali kujaribu kuendeleza miradi yake ya kuupanua mji mkuu kwenye eneo moja la kilimo. Watu wenye hasira wa eneo hilo wakiwemo wanachuo, wamemiminika mitaani kulaani kitendo hicho cha serikali ya Ethiopia na kusema kuwa ni kupora ardhi za watu ambao njia pekee ya kuendeshea maisha yao ni kilimo.

Mashirika ya haki za binadamu yameripoti kuwa, machafuko hayo yaliyoanza wiki kadhaa nyuma, yameshapelekea watu wasiopungua 140 kuuliwa na vikosi vya serikali katika eneo la Oromia.

Shirika la Human Rights Watch lilitangaza jana (Ijumaa) kuwa, huo ni mgogoro mkubwa zaidi kuwahi kushuhudiwa nchini Ethiopia tangu ule wa wakati wa uchaguzi wa mwaka 2005.

Kwa mujibu wa shirika hilo, watu wengine wengi wamejeruhiwa kwenye machafuko hayo.

Human Rights Watch limeongeza kuwa, idadi ya wahanga wa machafuko hayo ni kubwa sana.

Hadi tunapokea habari hii, serikali ya Ethiopia ilikuwa imedai ni watu watano tu ndio waliouawa kwenye machafuko hayo hadi hivi sasa.