MFAHAMU CHUCHE PEMBA, MWANAUME ANAYEISHI KWA KUTUMIA VITU VYA KIKE

Macho ya wakazi wa Segerea jijini Dar es Salaam yanatufuata kila tunakokatiza mimi na Chuche Atukuzwe Pemba, hata baadhi  walisimama ili wayaridhishe macho yao kwa kile wanachokiona.

Baada ya kututazama kwa mshangao, baadhi wanaonekana kunong’onezana jambo, lakini wapo pia ambao hawatushangai, bali wanamsalimia Chuche kwa heshima.

 Unajua kwa nini macho ya watu hawa yanatutazama kwa mshangao?

Ni kwa sababu Chuche, mwanaume wa miaka 45, ambaye aliwahi kuoa na sasa ana watoto wawili kuvaa mavazi ya kike.

Siyo hivyo tu, Chuche pia amejipaka wanja, rangi ya mdomo na kuvaa hereni na shanga za miguuni, huku kucha zake za mikono na miguu nazo zikiwa zimepakwa rangi na chini, akiwa amevalia viatu vya kike.

 Hali hii ya Chuche, haiwashangazi wanajamii wengi kama mimi na wewe pekee, bali hata wanafamilia wenzake,  akiwamo mama na ndugu zake.

Hakuna anayefahamu nini kilimpata Chuche, msomi mwenye Shahada ya Biashara na Diploma ya Usanifu wa Majengo kutoka Urusi, ambaye ni mwerevu katika masomo, ambaye awali alikuwa tegemeo la familia na pengine kama siyo mabadiliko haya, basi angekuwa hazina muhimu kwa taifa.

Nafika nyumbani kwa Chuche, naye ananikaribisha hadi katika chumba chake cha kulala. Humu nakutana na mandhari kama yale ya chumba cha mtoto wa kike.

 Ana kabati la viatu lililopangwa viatu vya kike, pia kuna meza ya vipodozi iliyojaa hereni, bangili, mikufu, manukato na mafuta ya aina mbalimbali.  Siku niliyokutana naye, alikuwa amevaa blauzi nyeupe ya mikono mifupi na kibana msuli (skin tight).  Ninapomuuliza kwa nini amegeuka na kuwa na tabia za kike? Chuche ananijibu kwa kifupi: 

Ni hobi yangu.

Chuche anasema kuwa anapenda kuvaa mavazi ya kike kwa sababu ni kitu anachokipenda na wala siyo kwa sababu nyingine yoyote.

Je, Chuche ni shoga?

Mimi siyo shoga, mimi ni mwanaume rijali, ushahidi ni watoto wangu hao. Lakini napenda kuvaa mavazi ya kike tangu nikiwa mdogo

anasema. Chuche alizaliwa mwaka 1969 jijini Dar es Salaam akiwa ni mmoja wa watoto wa familia ya marehemu Curthbet Pemba.

Watu wananiandama, wananipeleka  hospitali eti wanasema nina kichaa, lakini mimi ni mzima, isipokuwa napenda kuvaa mavazi ya kike. Sidhani kama kuvaa hivi naingilia maisha ya mtu  au namkera mtu, ni hobi yangu

anasema.

Chuche anasimulia kuwa baada ya kumaliza kidato cha nne katika Sekondari ya Jitegemee, Mgulani, alipata ufadhili wa masomo kwenda nchini Urusi.

Nilipata division one na nilikuwa mwanafunzi bora, kama unabisha nenda kaulize Jitegemee. Kwa sababu nilifaulu vizuri hasa masomo ya hesabu na sayansi, nilipata nafasi ya kusoma Urusi

anasema Chuche.

Anaeleza kuwa alipofika Urusi, alianza kusoma Stashahada ya Usanifu wa Majengo (architecture) kwa miaka miwili, kabla ya kuendelea na masomo  ya Shahada ya Biashara katika Chuo cha Haipei Polytechnic.

 Anasema kwamba muda mfupi baada ya  kumaliza masomo, alifanya kosa nchini humo na alifungwa jela. Hata hivyo, hakukaa sana kabla ya kuachiwa huru.

Kule kukaa jela kulisababisha nikaacha vyeti vyangu vyote na nikarudi nchini kwa haraka

anasema bila kuweka wazi kosa alilolifanya. Akiwa nchini Urusi, Chuche alipata mwenza, aliyejulikana kama Okhsana na wakati akirejea nchini, alirudi naye na kuanza maisha kama mume na mke.

Wakiwa nchini, Chuche na Okhsana, walibahatika kupata watoto wawili, wa kike na wa kiume. Kwa bahati mbaya, Okhsana alifariki dunia, mwaka 2002 kwa ugonjwa wa saratani  na kumwacha Chuche na watoto hao.

Mama yake Chuche

Mama yake Chuche, Matilda Pemba anasema kuwa kinachomsumbua Chuche bado ni kitendawili, kwani wameshahangaika sehemu tofauti ili kumwondoa katika hali hiyo ya kuvaa mavazi ya kike bila mafanikio.

Kama mama niliyezaa mtoto wa kiume, nikajua ni wa kiume silifurahii jambo hili hata kidogo. Nimehangaika sana kujua tatizo ni nini, lakini bado sijaona mafanikio

anasema.  Anabainisha kwamba, Chuche alianza kubadili tabia mara tu baada ya kurudi kutoka Urusi.

Aliporudi hapa alikuwa na mabadiliko, tulishangaa hata vyeti vyake hakurudi navyo. Ingawa alirudi na mke kabisa

anasema Matilda.

Anasema  iliwashangaza wanafamilia kumwona akivaa mavazi ya kike, wakati mwingine sketi na blauzi, wakati mwingine ‘skin tight’ na blauzi, hata khanga.

Nilidhani ni dawa za kulevya, lakini tulipompima  damu haikuonekana kuwa na dawa za kulevya. Nilifikiri labda ameanza mapenzi ya jinsia moja, lakini hilo pia siyo kwani angekuwa hivyo kila mtu angefahamu hata mimi ningejua

anasema mama Chuche.

Anaeleza kuwa wamejaribu kumtibu Chuche kwa madaktari wa magonjwa wa akili hata kufika Mirembe, lakini bado hakuna nafuu yeyote, wala dalili ya kurudi katika hali yake ya kawaida.

Tumempeleka kwenye maombi ya dini zote, Waislamu kwa Wakristo, lakini Chuche hakupata nafuu. Wanatuambia ana pepo la kike,

anasema

Matilda anasema kwamba ili kumzuia kuvaa mavazi ya kike, wakati mwingine huzichoma nguo hizo, lakini baada ya muda, Chuche hununua nyingine.

Rafiki wa Chuche

 Mmoja wa marafiki wa Chuche, Hans Kitomanga anasema kuwa anamfahamu Chuche kwa muda mrefu, ingawa bado hafahamu historia ya Chuche kuvaa mavazi ya kike.

Tangu nimekutana naye, namwona akivaa mavazi haya, nilimshangaa awali, lakini baadaye nikagundua kuwa ni mtu wa kawaida tu, tena ana akili zisizo za kawaida
anasema Kitomanga.

Anabainisha kuwa maisha ya Chuche yanawashangaza wengi na kuleta hisia nyingi, lakini kwake anamchukulia kama rafiki wa karibu anayehitaji bega la kuegemea.

Siyo hivyo tu, Kitomanga pia anakataa katakata hisia kuwa huenda Chuche anajihusisha na mapenzi ya jinsia moja na kusema: 

Watu hao wanajulikana hata kwa kuwaangalia tu na siyo lazima wavae mavazi ya kike kama anavyofanya Chuche.

Nini tatizo la Chuche?

Profesa Sylvia Kaaya wa Kitengo cha Magonjwa ya Akili katika Hospitali ya Taifa ya  Muhimbili(MNH) anasema kuwa watu kama Chuche kwa kitaalamu wanaitwa ‘Transvestite’ au wanaopenda kuvaa mavazi ya jinsi tofauti (cross dressing).

 Watu hawa kwa kwaida hujisikia furaha na amani wanapovaa mavazi ya jinsi tofauti, wakati mwingine kuwa na tabia za jinsi hiyo.

Baadhi ya wanawake huvaa kama wanaume, lakini asilimia kubwa  wanaopenda kuvaa mavazi ya jinsi tofauti ni wanaume.

Tafiti mbalimbali zilizofanyika duniani zimethibitisha kuwa wanaopenda kuvaa mavazi ya jinsi tofauti hawafanyi mapenzi ya jinsia moja.  Profesa Kaaya anasema kuwa wanaume wengi wanaopenda kuvaa mavazi ya kike, bado wanapenda kuwa wanaume na hawana mshawasha wa kuwa wanawake kwa kuwekewa vichocheo vya kike.

 Kinyume na hapo, wanaume ambao hawapendi kuwa wanaume na wanajisikia kuwa siyo wanaume ndani ya mioyo yao kwa kitaalamu huitwa, ‘gender dysphoria’ au kutoridhika na jinsi uliyozaliwa nayo.

 Hali ya kutoridhika na jinsia zao inapowasababishia kuchukua hatua  ya kubadili jinsi hizo, huitwa ‘transsexuals’