MKUTANO WA KUPINGa UGAIDI WAANZA IRAQ

Mkutano wa kwanza wa kimataifa wa kupambana na ugaidi umeanza leo kwa kuhudhuriwa na wawakilishi kutoka nchi na jumuiya mbalimbali za kimataifa huko Baghdad, mji mkuu wa Iraq. Wathiq al Hashemi Mkuu wa Kituo cha Kistratijia cha Nahrawayn na ambaye pia ni msemaji wa mkutano huo amesema kuwa, wawakilishi kutoka zaidi ya nchi 50 watajadili masuala mbalimbali yanayohusiana na vitendo vya makundi ya kigaidi. Al Hashemi amesema kuwa, mkutano huo wa siku mbili unahudhuriwa pia na ujumbe wa ngazi za juu kutoka nchi mbalimbali za eneo la Mashariki ya Kati, isipokuwa ujumbe kutoka Saudi Arabia na Qatar. Hivi karibuni  Waziri Mkuu wa Iraq Nouri al Maliki alizitaja nchi nchi hizo mbili kuwa chanzo cha kushadidi vitendo vya kigaidi nchini humo. Inaelezwa kuwa, makundi ya wabeba silaha yanayoungwa mkono na nchi hizo mbili, sasa yanaondoka nchini Syria na kuelekea Iraq kwa minajili ya kuvuruga hali ya usalama wa taifa hilo la Kiarabu.