AFRIKA KUSINI VS RWANDA...HALI TETE, VIZA ZAZUILIWA

Serikali ya Afrika Kusini imesimamisha utoaji viza kwa raia wa Kinyarwanda wanaotaka kuingia nchini humo. Taarifa iliyotolewa leo na ubalozi wa Afrika Kusini ulioko mjini Kigali imeeleza kuwa, tokea tarehe 10 Machi serikali ya Pretoria imesimamisha utoaji viza kwa raia wa Kinyarwanda wanaotaka kufanya safari nchini Afrika Kusini. Naye Louise Mushikiwabo Waziri wa Mambo ya Nchi za Nje wa Rwanda amesisitiza kuwa, Kigali imesikitishwa na hatua ya serikali ya Afrika Kusini ya kuwahifadhi wahusika wa mashambulio ya kigaidi yaliyofanyika nchini Rwanda. Mgogoro kati ya pande hizo mbili ulianza hivi karibuni, baada ya serikali ya Afrika Kusini kuwatimua wanadiplomasia watatu wa Rwanda, nayo serikali ya Kigali ikaamua kulipiza kisasi kwa kuwafukuza wanadiplomasia sita wa Afrika Kusini waliokuwa Kigali.  Wanadiplomasia hao wanatuhumiwa kuhusika na mashambulizi ya kigaidi yaliyofanywa na waasi wa serikali ya Rwanda walioko uhamishoni Afrika Kusini. Imeelezwa kuwa, uhusiano wa pande hizo mbili umekuwa ukilegalega katika miaka ya hivi karibuni, baada ya Afrika Kusini kupeleka majeshi yake mashariki mwa Jamhuri ya Kidemokrasia ya Kongo kwa shabaha ya kulinda amani, kitendo ambacho kinaonekana kuikasirisha  serikali ya Kigali.