KOREA YA KASKAZINI YAANZA MAJARIBIO YA MAKOMBORA YAKE

Korea Kaskazini imefanyia majaribio makombora mawili ya masafa ya kati kwa kuyavurumisha katika pwani ya bahari upande wa mashariki kuelekea Japan. 

Hayo yamejiri masaa machache baada ya viongozi wa Korea Kusini, Japan na Marekani kukutana huko Uholanzi kujadili mipango ya nyuklia ya Pyongyang.

Hii ni mara ya kwanza Korea Kaskazini kufanyia majaribio makombora ya aina hiyo tangu mwaka 2009, hatua inayoonesha kupiga hatua nchi hiyo kutoka makombora ya masafa mafupi ambayo imekuwa ikiyarusha katika wiki za hivi karibuni.

Marekani na Korea Kusini zimelaani majaribio hayo ambapo naibu msemaji wa Wizara ya Mambo ya Nje ya Marekani Marie Harf ameitaka Korea Kaskazini kusitisha majaribio hayo na kuacha hatua za vitisho. Naye msemaji wa Korea Kusini Kim Min-seok ameeleza kuwa, makombora hayo yana uwezo sio tu wa kulenga Japan bali pia Russia na China.

Katika wiki za hivi karibuni Korea Kaskazini imefanyia majaribio makombora kadhaa ya masafa mafupi, hatua iliyokwenda sambamba na kufanyika manuva ya pamoja ya kijeshi ya kila mwaka kati ya Korea Kusini na Marekani.