KENYA YAWADHULUMU WAKIMBIZI

Shirika la Kutetea Haki za Binadamu Amnesty International limesema wakimbizi Wasomali walioko Kenya wanadhulumiwa na haki zao kukiukwa, jambo ambalo linawalazimisha kuondoka katika nchi hiyo.

Katika ripoti iliyochapishwa Jumatano, shirika hilo la kutetea haki za binadamu limeonya kuhusu mazingira mabaya ya wakimbizi Wasomali nchini Kenya na kusema wanabughudhiwa na polisi  na kukamatwa kiholela bila sababu yoyote ya kisheria. Kwa mujibu wa ripoti hiyo iliyopewa anwani ya ‘No Place Like Home’ au ‘Hakuna Pahala Bora Zaidi ya Nyumbani’, Amnesty imesema wakimbizi wananyimwa  haki ya msingi ya usajili na hilo linamaanisha kuwa wanaishi kinyume cha sheria nchini Kenya. Naibu Mkuu wa Amnesty International mashariki mwa Afrika Sarah Jackson amesema wakimbizi Wasomali huko Kenya wana hali mbaya sana na kwa hivyo hawana budi ila kurejea makwao. Amesema kuyafanya mazingira yawe magumu kiasi cha kutoweza kustahimilika ni sawa na kuwalazimisha kurejea katika nchi yao ambayo bado inakumbwa na vita.

Wiki iliyopita serikali ya Kenya ilitoa wito kwa Somalia kuharakisha mchakato wa kuwapokea karibu wakimbizi nusu milioni wa Kisomali wanaoishi katika kambi za Umoja wa Mataifa nchini Kenya. Serikali ya Somalia imeafiki suala hilo lakini inasema wakimbizi wanapaswa kurejeshwa hatua  kwa hatua.