CCM WADAI UCHAGUZI WA KESHO ZANZIBAR NDIO SULUHU PEKEE YA MZOZO WA KISIASA VISIWANI HUMO

Wananchi wa Zanzibar kesho Jumapili wanatazamiwa kuelekea kwenye masanduku ya kupiga kura katika uchaguzi wa marudio visiwani humo, ambao utashirikisha wagombea wa urais na wagombea wa ujumbe wa Baraza la Wawakilishi kutoka vyama mbalimbali.

Wakati maandalizi yakiwa katika hatua za mwisho, Umoja wa Vijana wa Chama Cha Mapinduzi UVCCM, umesema uchaguzi wa marudio utakaofanyika kesho visiwani humo, ndiyo utakaotatua na kuhitimisha mvutano wa kisiasa ulioripuka baada ya Tume ya Uchaguzi Zanzibar ZEC kufuta matokeo ya uchaguzi wa Oktoba 25 mwaka jana. Umoja huo umewataka vijana pamoja na Wazanzibari wote kujitokeza kwa wingi kupiga kura, ili kutumia haki yao ya kuchagua rais kukwamua mzozo wa kisiasa visiwani Zanzibar. Kaimu Katibu Mkuu wa UVCCM, Shaka Hamdu Shaka alisema hayo jana alipokuwa akizungumza na waandishi wa habari katika Ofisi Kuu ya UVCCM, Gymkhana mjini Unguja. Shaka alisema wale wanaosema Zanzibar kuna mgogoro au tatizo linalohitaji kupatiwa suluhu, hawajatambua kiini cha tatizo na ufumbuzi wake. Alisema kiini cha tatizo linalosababisha mivutano ya kisiasa, ni Chama cha Wananchi (CUF) kukaidi utii wa matakwa ya sheria na kutaka kupuuza Katiba ya Zanzibar. Tayari ZEC imeshakamilisha hatua za msingi za kufanyika kwa uchaguzi huo, ikiwemo kuwasili kwa karatasi za kura. Hii ni katika hali ambayo, vyama tisa kati ya 14 vilivyoshiriki katika uchaguzi uliofutwa wa Oktoba 25, kikiwemo Chama cha Wananchi CUF ambacho kinadai mgombea wake wa urais Maalim Seif Sharif Hamad ndiye mshindi halali wa kiti hicho, vikiwa vimeshatangaza rasmi kwamba, havitashiriki katika uchaguzi huo.