MECHI ZOTE ZA WEEKEND HII KATIKA LIGI KUU YA VODACOM

Ligi kuu ya soka Tanzania bara itaendelea tena mwishoni mwa juma hili kwa michezo kadhaa kuunguruma kwenye viwanja tofauti, ambapo katika uwanja wa taifa jijini Dar es salaam Wekundu wa MSimbazi Simba watakuwa na kibarua cha kuwakabili Stand Utd (CHAMA LA WANA) kutoka mkoani Shinyanga.

Simba wataingia uwanjani hiyo kesho huku wakiwa na kumbu kumbu ya matokeo ya sare mbili mfululizo dhidi ya Polisi Morogoro pamoja na Costal Union hivyo watahitaji kurejesha matumaini kwa mashabiki wao kwa kuhakikisha ushindi wao wa kwanza msimu huu katika ligi ya Tanzania bara unapatikana.

Kwa upande wa Stand Utd, wameingia jijini Dar es salaam wakiwa na chagizo la ushindi wa bao moja kwa sifuri walioupata jijini Tanga katika uwanja wa CCM Mkwawani mbele ya wenyeji wao Mgambo JKT, hivyo watafanya njia zote za kutaka kuendeleza shangwe la ushindi mbele ya mnyama.

Mkoano Morogoro maafande wa jeshi la polisi mkoani humo kesho watacheza mchezo wao wa kwanza msimu huu katika uwanja wa nyumbani wa Jamuhuri dhidi ya wakata miwa kutoka mkoani Kagera, Wanankurukumbi Kagera Sukari.

Katika uwanja wa CCM Mkwawakni jijini Tanga wenyeji wa jiji hilo Costal Union nao watakuwa mbele ya mashabiki wao kwa mara ya kwanza tangu msimu huu ulipoanza kwa kuhakikisha wanasaka ushindi mbele ya Ndanda Fc kutoka mkoani Mtwara.

Huko jijini Mbeya maafande wa Tanzania Prisons nao watakuwa wanajaribu kuwaweka korokoroni mabingwa wa soka Tanzania bara Azam FC katika uwanja wa Sokoine.

Ikumbukwe kwamba Azam FC imeshinda michezo yao miwiwli iliyopita dhidi ya Ruvu Shooting pamoja na Polisi Morogoro hivyo nao hawatokuwa tayari kuharibiwa mpango wa kutaka kuendeleza wimbi la ushindi hiyo kesho.

Kwa upande wa Tanzania Prisons watahitaji kushinda mchezo huo kwa minajili ya kufuta makosa waliyoyafanya katika mchezo wao uliopita ambapo walikubali kufungwa na Dar es salaam Young African katika uwanja wa taifa mwishoni mwa juma lililopita mabao mawili kwa moja.

Mkoani Pwani katika uwanja wa Mabatini uliopo maeneo ya Mlandizi kesho kutakuwa na mtanange kati ya Mbeya City dhidi ya Ruvu Shooting.

Siku ya jumapili kutakuwa na michezo miwiwli ya ligi kuu ya soka Tanzania bara ambapo katika uwanja wa taifa jijini Dar es salaam kutakuwa na mpambano kati ya Dar es salaam Young Africans dhidi ya JKT Ruvu na mkoani Morogoro katika uwanja wa Manungu uliopo maeneo ya Turiani Mtibwa Sukari watawakaribisha Mgambo JKT kutoka wilayani Handeni mkoani Tanga.