NSSF YALALAMIKIWA

Wanachama wa mfuko wa hifadhi ya jamii NSSF mkoa wa Kilimanjaro wamelalamikia kero ya usumbufu na lugha ambazo siyo nzuri zinazotolewa na wafanyakazi wa mfuko huo kwa wanachama pindi wanapodai mafao yao.

Hayo yamebainishwa na mwakilishi wa wafanyakazi wa serikali kuu na afya tughe mkoa wa Kilimanjaro Bi Gresta Sodaka wakati wa tume iliyoundwa kuchunguza kero za wanachama wa mfuko huo ilipokuwa inawakiilisha malalamiko hayo kwa meneja wa mfuko wa hifadhi ya jamii mkoani Kilimanjaro.

Amesema kero zinazowakabili wanachama ni nyingi ikiwemo waajiri kutowasilisha michango ya wanachama na pindi wafanyakazi wanapostaafu na kufuatailia mafao yao kujikuta wanapata mafao kidogo ambayo hayalingani na muda waliofanya kazi.

Kwa upande wake katibu wa chama cha wafanyakazi wa serikali kuu na afya tughe mkoa wa Kilimanjaro Bw. Simon Msuya ameiomba serikali kusimamia mifuko ya jamii ili iweze kutoa mafao yanayolingana kwa wananchama wote wanaojiunga na mifuko hiyo hapa nchini.

Akijibu malalamiko hayo meneja wa mfuko wa hifadhi ya jamii NSSF mkoa wa Kilimanjaro Bi Delifina Masika amesema haweza kukubali wala kukataa malalamiko yaliyotolewa dhidi ya wafanyakazi wa mfuko huo na kuahidi kufuatilia ili kutokomeza kero hizo ambazo hazistahili kwa kuwa kufanya hivyo ni kinyume na taratibu za mfuko huo.