MWANAMKE AUAWA KWA UPANGA MPANDA

MKAZI wa Kijiji cha Mwamkuru, Wilaya ya Mpanda, Suzana  Kingi  (40), ameuawa  kwa kukatwa katwa na  mapanga shingoni, kichwani na mikononi  na mtu asiyejulikana.

Kamanda wa Polisi wa Mkoa wa Katavi, Dhahiri Kidavashari, alisema jana kuwa mauaji hayo yalitokea juzi, saa 9 usiku nyumbani kwa Suzana kijijini hapo  alipokuwa akiishi.

Alisema siku ya tukio Suzana alikuwa amelala  nyumbani  kwake peke yake  jirani  na nyumba waliokuwa wakiishi wakwe zake, Maria  Kayungiro na Maria  Nsabi  pamoja na mtoto wake aitwaye  Paul  Charles.

Alisema wakati Maria Kayungiro akiwa chumbani  kwake alimsikia Suzana akikimbia  kutoka kwenye  nyumba yake kuelekea kwenye nyumba ya mtoto wake, Paulo huku  akipiga  mayowe ya kuomba msaada.

Kamanda Kidavashari alieleza wakati huo muuaji huyo alikuwa  akimfuata. Alipofika katika nyumba hiyo, mtoto wake hakuwepo, kwani alikuwa amekwenda kwenye harusi kijiji cha jirani  na ndani ya nyumba alikuwemo  Maria  Nsabi.

Muuaji aliingia ndani na kuanza kumkatakata Suzana huku akimmulika  kwa tochi Maria  Nsabi  pamoja na kumtishia  kuwa akipiga kelele  naye atamuua

alisema.

Kamanda Kidavashari alisema uchunguzi wa awali  unaonyesha  chanzo  cha  mauaji  hayo ni  imani za kishirikina  na hakuna mtu aliyekamatwa kuhusiana na tukio hilo.