WAFANYA BIASHARA WAELEZEA TAABU WANAYOIPATA HASA BANDARINI, NI KATI YA KERO ZA MUUNGANO

Baadhi ya wafanyabiashara wamesema vikwazo vya ndani vya kufanya biashara vinawakatisha tamaa ya kuchangamkia masoko kwenye nchi wanachama wa Jumuiya ya Afrika Mashariki (EAC).

Wafanyabishara hao walisema hayo hivi karibuni kwenye kongamano la Jumuiya ya Afrika Mashariki lililoandaliwa na Wizara ya Afrika Mashariki kwa kushirikiana na Ofisi ya Makamu wa Rais.

Wakichangia katika kongamano hilo, wafanyabishara hao walisema bado kuna vizuizi vingi kwenye barabara ambavyo vinawasababishia usumbufu mkubwa.

“Bado barabara zetu zina vizuizi vingi, kuna aina nyingi za ushuru unaokatisha tamaa wafanyabiashara,” alisema Shaaban Saleh (34) mkazi wa Chakechake, Pemba .

Aliongeza kuwa: “Viongozi wanatuhamasisha kuchangamkia soko la nchi za Afrika Mashariki wakati hapa nyumbani hakuna mazingira mazuri ya kufanya biashara, tutavukaje kwenda uko.”

Naye Mkazi wa Mkoa wa Mjini Magharibi, Omar Suleiman Ali (51), alisema yeye ni mtengenezaji wa viungo, lakini imekuwa tabu hata kuvifikisha kwenye maonyesho ya sabasaba Viwanja vya Mwalimu Julius Nyerere.

“Ukitoka Zanzibar ukifika katika Bandari ya Dar es Salaam unasumbuliwa, wanafanya ukaguzi utadhani unaingia katika nchi nyingine wakati sisi tayari tuko katika muungano,” alisema Ali.

Alisema bidhaa anazozitengeneza zimekosa alama za viwango vya ubora kwa sababu Zanzibar hakukuwa na taasisi kama ilivyo Shirika la Viwango vya Ubora (TBS) kwa upande wa Tanzania Bara. Alisema kikwazo hicho kilikwamisha uuzaji wa bidhaa zao kwa sababu wanunuzi wanataka kufahamu ubora wa bidhaa.