UVUVI HARAMU UNAISHUSHA MWANZA KIUCHUMI

Chama cha Wavuvi Tanzania (Taf) kimesema hali ya upatikanaji samaki kwenye Ziwa Victoria imeshuka kwa kasi kutokana na kuongezeka kwa vitendo vya uvuvi haramu.

Pia, Taf kimesema sheria za uvuvi zinawabana wavuvi wadogo kupata faida na badala yake zinatoa nguvu kwa viwanda vikubwa vya samaki, jambo ambalo alisema linachangia kupunguza ajira kwa vijana mkoani hapa.

Wakizungumza juzi kwa nyakati tofauti kwenye Soko la Samaki Mwaloni, mwenyekiti wa Kamati ya Fedha wa Taf, Bakari Kadabi alisema upatikanaji samaki umeshuka kwa kiwango kikubwa kutokana na kuongezeka kwa vitendo vya uvuzi haramu na mapambano hayajafanikiwa.

Alisema asilimia 70 ya uchumi wa Mwanza inategemea uvuvi, hivyo upungufu huo unashusha mapato ya Serikali.

“Kwa miaka miwili upatikanaji wa samaki Ziwa Victoria umepungua kwa kasi kutokana na uvuvi haramu kuongezeka. Hali hiyo inasababisha mazalia ya samaki kuharibika,” alisema Kadabi.

Kadabi alisema watu milioni tatu wanategemea uvuvi kupata kipato, tofauti na sekta ya viwanda ambayo inachukua watu 300,000, hivyo ni vyema Serikali ikaweka mikakati sahihi ya kupambana na uvuvi haramu Ziwa Victoria.

Naye katibu wa wauza samaki sokoni hapo, Edina Tibanga alisema soko la samaki limetekwa na wafanyabiashara wa kigeni, kitu ambacho kinawanyima fursa kunufaika na biashara hiyo. “Hapa sokoni wengi ni wafanyabiashara wa kigeni hasa kutoka nchi ya Jamhuri ya Kidemokrasia ya Kongo (DRC), huku Watanzania wakibakia kuwa vibarua. Haturidhishwi na hali hiyo,” alisema Tibanga.