DRONE ZAUA WATU 2400

Ndege zisizo na rubani za Marekani zimeuwa kwa akali watu 2,400 duniani katika kipindi cha miaka mitano tokea Rais Barack Obama aingie madarakani nchini humo.

Uchunguzi uliofanywa na Bureau of Investigative Journalism (TBIJ) yenye makao yake nchini Uingereza unaonyesha kuwa, kuanzia mwaka 2009 yamefanyika karibu mashambulio 390 ya ndege zisizo na rubani katika nchi za Pakistan, Yemen na Somalia, kiwango hicho kikiwa ni mara nane ya mashambulio yaliyofanywa katika kipindi cha uongozi wa George W. Bush Rais wa zamani wa Marekani. Ripoti ya TBIJ imeonyesha kuwa, nchini Pakistan pekee kuanzia mwaka 2009 hadi sasa, jumla ya watu 951 wameshauawa wakiwemo watoto 200. Ripoti hiyo imeeleza kuwa, drone za Kimarekani zimefanya mashambulio 58 nchini Yemen na kuuwa zaidi ya watu 281. Inafaa kuashiria hapa kuwa, mwezi Oktoba mwaka jana Shirika la Kutetea Haki za Binadamu la Human Rights Watch lilikosoa vikali mashambulizi yanayofanywa na ndege zisizo na rubani za Marekani katika nchi mbalimbali, na kutaka ufanyike uchunguzi wa mauaji dhidi ya wahanga ambao hawana mafungamano yoyote na makundi ya kigaidi.