WARIOBA AWATAKA WATANZANIA KUTULIA WAKATI WA KUPIGIA KURA KATIBA

Mwenyekiti wa iliyokuwa Tume ya Mabadiliko ya Katiba, nchini Tanzania Jaji Joseph Warioba amewataka Watanzania kutokurupuka kuipitisha Katiba Inayopendekezwa kwa kuwa imeyaacha kando maoni yao mengi. 

Jaji Joseph Warioba amewataka Watanzania  waisome kwa makini katiba hiyo kabla ya kuikubali au kuikataa. Jaji Warioba amesema, Katiba hiyo haina maoni yote ya wananchi kama Bunge Maalumu lilivyojinadi, bali yamewekwa machache ambayo hata hivyo yamo hata katika Katiba ya sasa. 

Warioba amesema, wananchi wengi walipendekeza kiwepo kipengele cha maadili ya viongozi ili kuwadhibiti dhidi ya vitendo viovu wanavyovifanya kwa sasa kama ufisadi, rushwa na matumizi mabaya ya madaraka, lakini wajumbe wa Bunge walikirekebisha hadi kikapoteza maana. 

Vile vile Jaji Warioba amebainisha kwamba, wananchi walipendekeza muundo wa muungano wa serikali tatu ili kuondoa kero na matatizo yaliyopo, kupatiwa madaraka ya kuwawajibisha wabunge wao pamoja na rais kupunguziwa madaraka, mambo ambayo yameondolewa na Bunge hilo Maalumu. 

Tayari mrengo wa upinzani nchini Tanzania chini ya Umoja wa Katiba ya Wananchi UKAWA umetangaza kwamba, utatembea nchi nzima kuwahamasisha Watanzania waikatae Katiba hiyo ambayo wanasema imepuuza na kuweka kapuni maoni ya wananchi waliowengi.