WANNE WENGINE WAUAWA NCHINI KENYA

Habari kutoka hospitali katika Kaunti ya Mombasa nchini Kenya zinasema kuwa, watu wanne wameuawa baada ya kundi lililokuwa na silaha kufyatua risasi katika eneo la Soweto, Likoni Kaunti ya Mombasa. Robert Kitur Kamanda wa Polisi wa Kaunti ya Mombasa  hakueleza  kama shambulio hilo ni la kigaidi au la uhalifu, bali alisisitiza kwamba watu wawili wameuawa kwenye shambulio hilo lililofanywa na watu wenye silaha waliokuwa wamepanda pikipiki. Hata hivyo, duru za hospitali kuu ya Mombasa zinaeleza kuwa, viwiliwili vinne vililetwa hospitalini hapo kufuatia shambulio hilo la jana. Duru hizo zimeeleza kuwa, watu wengine wanane walijeruhiwa kwenye shambulio hilo. Kamanda Kitur amesema kuwa, hakuna kundi lolote lililotangaza hadi sasa kuhusika na shambulio hilo. Mashuhuda wa tukio hilo katika eneo la Soweto wanasema kuwa, watu wanne wenye silaha walitekeleza shambulio hilo lililochukua muda wa dakika kumi na tano.