WATU MILIONI 7 HUFA KWA HEWA CHAFU KILA MWAKA

Kikao cha kwanza cha Baraza la Mazingira la Umoja wa Mataifa (UNEA), kimehitimishwa  mjini Nairobi, Kenya kwa wito wa kutaka hatua zichukuliwe ili kuboresha usafi wa hewa na kuzuia vifo milioni 7 vya mapema ambavyo hutokana na hewa chafu. Kikao hicho cha siku tano kilihitimishwa Ijumaa kwa kupitisha maazimio 16 yanayohimiza hatua za kimataifa katika kukabiliana na masuala kadhaa yanayohusu mazingira, yakiwemo yanayohusiana na biashara haramu ya viumbe wa porini, usafi wa hewa, taka za plastiki katika bahari, kemikali na taka kwa ujumla. Akizungumza wakati wa kufunga kikao hicho, Katibu Mkuu wa Umoja wa Mataifa, Ban Ki-Moon, alisema kuwa hewa tunayopumua, maji tunayokunywa na udongo tunamozalishia chakula, ni sehemu ya bayo anuai ambayo inaendelea kukabiliwa na shinikizo kubwa. Baraza hilo lilitambulisha uchafuzi wa hewa kama tatizo linalopaswa kupewa kipaumbele na jamii ya kimataifa, ili kuepusha vifo milioni 7 kila mwaka, kwa mujibu wa takwimu za Shirika la Afya Duniani, WHO. Jamhuri ya Kiislamu ya Iran iliwakilishwa katika mkutano huo na makamu wake wa rais ambaye pia ni Mkuu wa Shirika la Mazingira Iran Dkt. Maasoumeh Ebtekar. Akiwa nchini Kenya Bi. Ebtekar pia alikutana na kufanya mazungumzo naProf. Judi Wakhungu Waziri wa Mazingira, Maji na Mali Asili wa Kenya ambapo walijadili masuala ya kimataifa na ushirikiano wa Tehran na Nairobi katika masuala ya mazingira, ustawi endelevu na utalii wa kimazingira yaani Eco-tourism.