HUYU NDIO MGANGA WA KIENYEJI TOKA GHANA ANAYEPIGANA KUFA KUPONA C. RONALDO ASISHIRIKI KOMBE LA DUNIA, ADAI NDIYE ALIYEMROGA

Mganga wa Jadi raia wa Ghana, amedai kwamba anahusika kikamilifu kwa jeraha la nahodha wa Portugal, Cristiano Ronaldo linalotishia ushiriki wake kwenye Kombe la Dunia. Portugal wapo kundi moja Group G, kundi gumu lililobatizwa jina la 'Kundi la Kifo', ambapo ukiachilia Portugal yeyewe pia zimo timu za Germany, USA na Ghana yenyewe.

Ronaldo hajacheza mchezo wowote tokea alipofunga moja kati ya mabao manne ya Real Madrid katika fainali ya Champions League dhidi ya Atletico Madrid May 25 na taarifa iliyotolewa na Chama cha Mpira cha Portugal siku ya Jumatano kimethibitisha kwamba straika huyo ana taabu katika misuli katika goti lake la kushoto na pia kushikwa na misuli ya paja.

Mganga huyo wa kienyeji, ambaye jina lake ni Nana Kwaku Bonsam(pichani) likiwa na maana 'Jini la Jumatano', alitabiri Mwezi wa Pili mwaka huu(Februari) kwamba Ronaldo atalazimika kulikosa kombe la Dunia ili kuipa Ghana nafasi kubwa zaidi ya kupita katika "kundi hilo la kifo".

Katika mahojiano na kituo cha habari cha Kumasi-kiitwacho Angel FM, alijibu kwa kusema: 

Najua kila kitu kuhusu jeraha la Cristiano Ronaldo, Na naendelea kumfanyia kazi.
Sina utani kuhusu hili. Wiki iliyopita, nilikua katika mizunguko nikitafuta mbwa wanne na niliwapata, nitawatumia kutengeneza dawa maalum ya nguvu za giza inayoitwa Kahwiri Kapam.

Nililisema hili miezi minne iliyopita kwamba nitamshughulikia Cristiano Ronaldo na nitahakikisha anakua nje ya Kombe la Dunia ama angalau kuzuia asicheze dhidi ya Ghana na njia pekee ya kufanikisha hili ni kumuweka nje kwa njia ya majeruhi.

Jeraha hili haliwezi kutibika kwa dawa yoyote, na haitokua wazi nini hasa kinasababisha kwa sababu ni nguvu za giza. Leo watasema ni goti, kesho watasema ni paja, na siku itakayofuata watasema ni kitu kingine.