WATU 7 WAKIWEMO MAMENEJA WAWILI BENKI YA BACLAYS WAFIKISHWA MAHAKAMANI KWA WIZI WA TSH. 479 MILIONI

Watu saba wakiwamo mameneja wawili wa Benki ya Barclays wamefikishwa katika  Mahakama ya Hakimu Mkazi Kisutu wakikabiliwa na mashtaka  ya wizi wa zaidi ya Sh479 milioni mali ya benki hiyo.

Akiwasomea hati ya mashtaka yanayowakabili washtakiwa hao, Wakili wa Serikali Mwandamizi, Tumain Kweka akishirikiana na wakili mwenzie wa serikali Mwanaamina Kombakono  waliwataja washtakiwa hao kuwa ni Meneja wa benki hiyo Tawi la Kinondoni, Alune Kasililika (28).

Washtakiwa  wengine ni Meneja Neema Batchu, wafanyabiashara  Kakamie Julius (32), Iddy Khamis (32), Sezary Massawe (31), Boniphace Muumba (29) na Ruth Macha (30).

Kweka alidai kuwa  siku ambayo haifahamiki washtakiwa hao kwa pamoja wakiwa jijini Dar es Salaam  walipanga njama ya kutenda kosa hilo la wizi.

 Alidai kuwa Aprili 15, katika Benki ya Barclays Tawi la Kinondoni, washtakiwa hao waliiba Sh390,220,000, dola za Marekani  55,000  na Euro 2,150.

Wakili huyo wa Serikali aliendelea kudai kuwa kabla ya washtakiwa hao kufanikisha wizi huo, waliwaua wafanyakazi wa benki hiyo ya Barclays Anifa Ahmad na Anna Tegete  ili waweze kuzichukua fedha hizo kwa urahisi.

Baada ya kusomewa mashtaka hayo yanayowakabili, washtakiwa  wote waliyakana na upande wa mashtaka ulidai kuwa upelelezi wa kesi hiyo bado haujakamilika.

Hakimu Mkazi, Nyigulile Mwaseba aliiahirisha kesi hiyo hadi Mei 15,na kuamuru washtakiwa hao kupelekwa rumande  kwa kuwa  mashtaka yanayowakabili  ni moja kati ya  mashtaka yasiyo na dhamana kisheria.