VITUKO VYA FAINALI ZA KOMBE LA DUNIA 2014, RONALDO ADAI MABAUNSA 6, WAKINA VALENCIA WADAI NDIZI ZAO, UFARANSA WATAKA SABUNI ZA MAJI NA MENGINE KIBAO, YASOME HAPA

WAKATI fainali za Kombe la Dunia zikiwa zinakaribia kuanza, vioja mbalimbali vimeanza kuibuka kutokana na maombi mbalimbali yanayowasilishwa na baadhi ya timu katika masharti ya kushiriki fainali hizo.

Ronaldo kulindwa na mabaunsa sita

Shirikisho la Soka la Ureno limeomba walinzi sita kwa ajili ya safari zao mbalimbali za kujiburudisha miili yao katika fukwe za Copacabana na kwingineko. Kati ya walinzi wao, wanne watakuwa na kazi ya kumlinda Mwanasoka Bora wa Dunia kwa sasa, Cristiano Ronaldo peke yake wakati wengine watakuwa na kazi ya kulinda wachezaji wengine na viongozi wa timu hiyo. Ronaldo, Lionel Messi na Neymar wanatarajiwa kuwa mastaa wenye mvuto zaidi katika michuano hiyo kutokana na ubora wao katika ligi mbalimbali za Ulaya.

Ufaransa wataka sabuni za maji

Katika hali ya kushangaza, Ufaransa ambao wataongozwa na wakali kama Franck Ribery, Olivier Giroud, Karim Benzema na wengineo wametoa madai ya kushtusha zaidi baada ya kudai kwamba watataka sabuni za maji katika vyumba vya wachezaji wao na si sabuni za vipande.

Uongozi wa mabingwa hao wa Kombe la Dunia mwaka 1998 wanataka vyumba vyao vyote vya hoteli watakayofikia jijini Sao Paulo kuwekwa sabuni za maji na sio sabuni za vipande. Ufaransa pia wanataka hoteli yao iwe na nyama ambazo zimechinjwa kihalali kwa sababu wachezaji wao wengi ni Waislamu.

Akina Valencia wataka ndizi zao

Timu ya taifa ya Ecuador imeandika maombi yao ya kutaka kila mchezaji wao apewe kikapu cha ndizi mbivu kutoka nchini kwao Ecuador kila siku ya michuano hiyo. Kikosi chao kinachoongozwa na mkali wa Manchester United, Antonio Valencia kinataka ndizi hizo zisafirishwe kutoka katika ardhi ya kwao Ecuador kila siku. Ndizi mbivu ni chakula maarufu kwa wanasoka wote duniani kwa ajili ya kurudisha sukari iliyopotea mwilini kutokana na mazoezi mazito ya kila siku.

Algeria wataka Kurani kila chumba

Shirikisho la Soka la Algeria limetaka kila chumba cha wachezaji pamoja na maofisa watakaoambatana na timu hiyo kuwekwa vitabu vitakatifu vya dini ya Kiislamu, Kurani kwa ajili ya maombi yao ya kila siku wakati watakapokuwa katika michuano hiyo. Kikosi chote cha Algeria kitakuwa na wachezaji Waislamu. Hapana shaka baadhi ya wachezaji wakubwa duniani wanaofuata imani ya Kiislamu ambao watakuwa katika michuano hiyo wanaweza kuhitaji pia kuwekewa Kurani katika vyumba vya hoteli zao. Wachezaji hao ni kama Mesut Ozil, Yaya Toure, Cheikh Tiote, Samir Nasri na wengineo.

Australia wameomba katika hoteli yao kuwe na vyumba maalumu vya kahawa kwa ajili ya wachezaji wao. Wanataka pia katika vyumba hivyo maalumu kwenda na magazeti mbalimbali kutoka pembe zote za dunia kwa ajili ya kupata habari na kuburudika. Mastaa wao ambao wanataka kupoza vichwa kwa kahawa na magazeti ni pamoja na kiungo wa zamani wa Everton, Tim Cahill anayekipiga na Thierry Henry katika klabu ya New York Red Bull pamoja na kipa, Mark Schwarzer anayekipiga Chelsea akiwa msaidizi wa Petr Cech.

Chile wataka vitanda vipya

Mastaa wa Chile ambao hapana shaka wataongozwa na mkali wa Barcelona, Alexis Sanchez pamoja na David Pizarro wa Bayern Munich, Arturo Vidal na Mauricio Isla wa Juventus wametaka kila chumba watakachofikia kiwe na kitanda kipya pamoja na seti mpya za televisheni. Wametaka vitanda vya zamani vyote viondolewe pamoja na seti za zamani za televisheni ziondolewe.

Colombia waja na kali mpya

Shirikisho la Soka la Colombia limekuja na kali mpya. Wanataka wachezaji 15 wa timu ya vijana ya Sao Paulo wapelekwe katika kambi yao kwa ajili ya kucheza mechi za kirafiki za mazoezi kila siku asubuhi. Wanataka mazoezi yao yawe ya nguvu na itakuwa vigumu kupata kitu hicho kama watacheza wenyewe kwa wenyewe. Colombia ipo Kundi C pamoja na Ugiriki, Ivory Coast na Japan.

Honduras wataka TV za Kihispaniola

Shirikisho la Soka la Honduras linataka stesheni sita za idhaa za Hispania ziongezwe katika televisheni za vyumbani kwao huku pia wakitaka idhaa mbili za Honduras nazo ziongezwe katika idhaa za hoteli hiyo. Madai yao ni kama ya timu ya taifa ya Uswisi ambao wanataka kuwe na chaneli mbili za televisheni za kwao Uswisi katika kila chumba.

Wakati wao wakitaka madai hayo yatimizwe, Japan wanataka kila chumba kiwe na bafu la fahari la kuogea, Jacuzzi kwa ajili ya kuhakikisha wachezaji wao wanapumzika vilivyo baada ya mazoezi na mechi zao.

Ni kama ilivyo kwa Luis Suarez na Uruguay yao ambapo wamekuwa wakitaka kuwa na vipoza hewa (Air Conditions) zisizotoa sauti.

Video games zatawala

Maombi yaliyotumwa na timu nyingi zaidi kwa pamoja ni yale ya kutaka kuwepo kwa vyumba vya michezo ya kompyuta (Video games). Ufaransa, Ecuador na Costa Rica zote zimepeleka maombi hayo, lakini Ureno inataka kila chumba cha hoteli yao kiwe na Video Game.