KARIAKOO HATARINI

Maghorofa 64 yaliyopo eneo la Kariakoo, Manispaa ya Ilala yamejengwa kinyume na sheria na kwamba baadhi yanaweza kuporomoka kutokana na ujenzi wake kuwa chini ya kiwango.

Kampuni iliyopewa zabuni ya kufanya ukaguzi wa majengo Manispaa ya Ilala, inayoitwa Design Plus Architects (DPA) imebaini kati ya majengo ya ghorofa 90 yaliyokaguliwa, 67 yamejengwa kinyume na sheria.

Uamuzi wa kuipa kampuni binafsi kazi ya kukagua majengo, umekuja baada ya jengo la ghorofa 16 kuanguka na kuua watu 36 Machi 26, mwaka huu.

Meneja Uendeshaji wa DPA, Mustafa Maulid amesema kwamba ukaguzi wa majengo hayo umeanza Julai mwaka huu baada ya kupata zabuni hiyo.

Maulidi amsema kuwa hali ni mbaya katika majengo waliyoyakagua, kuna majengo ya ghorofa yenye nyufa nyingi, pia yapo majengo yanayogusana ambayo ni hatari kwa watumiaji.

Meya wa Manispaa ya Ilala, Jerry Silaa alipoulizwa hatua za kuchukua, amesema vikao vya madiwani vitaamua hatua za kuchukua baada ya kuipitia ripoti ya ukaguzi huo.

Akifafanua zaidi, Maulid amesema makosa waliyoyabaini ni watu kuendesha ujenzi bila kuwa na vibali.

Aidha amesema kuwa makosa mengine ni ujenzi bila kufuata michoro iliyoidhinishwa na Manispaa ya Ilala.