BUNGE LA KATIBA LATUNGIWA FILAMU

IKIWA ni miezi kadhaa tangu kufanyike Bunge la Katiba kwa lengo la kutaka kutengeneza katiba mpya bila mafanikio, taswira ya Bunge hilo sasa imewekwa katika filamu inayotarajiwa kuachiwa mwezi ujao.

Msanii Mohamed Jongo ‘Muddy Jongo’ ndiye aliyeandika muswada na kurekodi filamu hiyo  kuonyesha mwelekeo wa mawazo yaliyokuwa yakijadiliwa katika Bunge hilo lililofanyika mjini Dodoma.

Akizungumza Dar es Salaam jana, Jongo ambaye ni dansa wa zamani aliyekuwa akicheza muziki huku akichezea moto hadi kuwahi kuunguzwa, alisema filamu hiyo inaonyesha unyonge wa wananchi, wabunge waliochaguliwa kuwawakilisha wanavyowadharau na kutaka kuweka kile wanachokitaka wao.

Alisema filamu hiyo ambayo itatoka mwezi ujao, inaonyesha jinsi michango ya mawazo ya wananchi isivyothaminiwa, hivyo Mzee Muungaro na wenzake kutoka Kijiji cha Amka wanajikusanya na kwenda Dodoma kunakofanyika vikao vya Bunge kueleza msimamo wao.

Jongo aliyeandika na kurekodi filamu zenye mwelekeo wa maisha ya kawaida  ya jamii ya Kiafrika ambazo zinafanya vizuri nje ya nchi zikiwemo ‘Fungato’ (Ficho la Uchawi) na ‘Vibration Fish’, anasema katika filamu hiyo wameshiriki wasanii wenye majina na chipukizi ambao wana uwezo katika tasnia hiyo.

Aliwataja baadhi ya washiriki ni yeye (Jongo), Mzee Kibinda, Mikurupuko, Bibi Waiti, Mama Chambele, Mbega na Kindamba. Pia yumo mmoja wa wajumbe wa Bunge halisi la Katiba, Mama Jura.