BOKO HARAM WAMTEKA MKE WA NAIBU WAZIRI MKUU CAMEROON

Habari zinasema kuwa kundi la Boko Haram la nchini Nigeria limeishambulia nyumba ya Naibu Waziri Mkuu wa Cameroon karibu na mpaka wa nchi hiyo na Nigeria na kumteka nyara mke wake. Issa Tichiroma Bakary, Waziri wa habari wa Cameroon na msemaji wa serikali ya nchi hiyo amesema kuwa, kundi la Boko Haram leo limeishambulia nyumba ya Amadou Ali, Naibu Waziri Mkuu wa nchi hiyo katika mji mdogo wa Kolofata kaskazini mwa Cameroon na kuuwa watu wasiopungua watatu na kumteka nyara mke wake. Waziri wa Habari wa Cameroon ameongeza kuwa wanamgambo wa Boko Haram pia wameishambulia nyumba ya kiongozi wa kidini katika eneo hilo aliyetambuliwa kwa jina la Seini Boukar Lamine na kumteka nyara. Itakumbukwa kuwa, mahakama moja ya kijeshi ya Cameroon jana iliwahukumu kifungo cha jela kuanzia miaka 10 hadi 20 wanachama 14 wa Boko Haram. Inaonekana kuwa shambulio hilo la leo limefanywa kulipiza kisasi cha hatua hiyo ya mahakama ya kijeshi ya Cameroon.