VIGOGO 12 WA MADAWA YA KULEVYA WAKAMATWA

Vigogo 12 wanaodaiwa kusafirisha dawa za kulevya wanahojiwa katika vituo mbalimbali baada ya kutajwa kwenye orodha zilizowasilishwa serikalini na watu mbalimbali.

Ofisa wa Tume ya Kudhibiti Dawa za Kulevya Tanzania, Januari Ntisi alisema hayo wakati akijibu maswali ya waandishi wa habari walioituhumu tume hiyo kuwa ilishapelekewa majina ya vigogo wanaojihusisha na biashara ya dawa za kulevya, lakini imeyakalia.

Ntisi alikuwa anashiriki  kwenye mkutano wa mkuu wa Mkoa wa Mbeya, Abbasi Kandoro na waandishi wa habari alipozungumzia maadhimisho ya Siku ya Kupambana na Dawa za Kulevya mwaka huu ambayo hufanyika kila ifikapo Juni 26 ya kila mwaka. Kitaifa maadhimisho hayo yanafanyika mkoani hapa na mgeni rasmi atakuwa makamu wa rais, Dk Mohamed Gharib Bilal.

Ni kweli Serikali ilipata majina mengi ya vigogo wa dawa za kulevya, lakini katika uchunguzi yakinifu tumeanza kuwashughulikia 12 ambao wanatafutwa pia na nchi za Marekani na Ujerumani

alisema.

Ntisi alisema katika kufuatilia taarifa hizo, Serikali pia ilifanikiwa kukamata tani 2.3 za dawa aina ya heroine kwenye Bahari ya Hindi pekee kati ya Januari na Juni, mwaka huu. Hata hivyo alisita kuwataja wanaoshikiliwa akisema mapambano yanazidi kupamba moto kwa kuwafuatilia vigogo wengine.

Awali, mkuu wa Mkoa wa Mbeya, Kandoro akizungumzia suala la maadhimisho ya siku hiyo, aliwataka wakazi wote mkoani   Mbeya na mikoa jirani, kujitokeza kwa wingi kushiriki  ili wapate elimu kuhusu madhara yatokanayo na dawa za kulevya ili waepukane nazo. Alisema tayari baadhi ya taasisi zimeshaanza kutoa elimu katika mabanda yaliyopo viwanja vya maonyesho.