WATOTO WASIMULIA WENZAO WATATU WALIVYOKUFA MAJI KATIKA SWEEMING POOL

Ilikuwa ni safari ya kawaida ambayo ilitarajiwa kuwapa faraja watoto. Lakini hali imekuwa tofauti baada ya matarajio hayo kugeuka majonzi kwa mtaa mzima kutokana na kuondokewa na watoto watatu kwa wakati mmoja.

Ni mara chache sana watoto hutoka pamoja kwenda mbali kufurahia na wenzao. Hivyo Janet, Ndimbumi na Eva waliamini kuwa siku hiyo ingewapa furaha na pengine hadithi za kwenda kusimulia shuleni, lakini haikutokea kama walivyotarajia; simulizi zikawa tofauti.

Tulistuka kuuona mwili wa Janeth ukiwa unaelea juu ya maji

anasema kaka yake, Goodluck Kihoko (14) ambaye siku hiyo alienda pamoja na watoto wengine 20 kwenye Hoteli ya Landmark iliyo Mbezi Beach, jijini Dar es salaam.

Tuliwaita walinzi, lakini wakapuuza. Tuliwaita walinzi kwa muda mrefu ndipo wakafika na wakati huo mama na wale vijana walikuwa mbali na pale tulipokuwa tukiogelea. Baada ya muda walikuja na tukauona mwili wa pili ukiibuka

anasimulia Gooluck kwa uchungu.

Wakisimulia tulio hilo, watoto waliokuwa katika msafara huo Florian Masonda (12) anasema  walichukuliwa na jirani yao, Anita Mboka kwenda kusherehekea nao siku ya kuzaliwa kwa mtoto wake, Derick Mboka aliyekuwa anatimiza umri wa mwaka mmoja.

Florian anasema baada ya kufika hotelini hapo walianza kucheza mpira wa kikapu huku watoto wengine wakiogelea na mama Mboka aliyewapeleka pamoja na wale vijana wakiwa wamekaa wakipata vinywaji.

Tulikuwa tunacheza mpira wa kikapu na ghafla tulisikia kelele baada ya mtoto mmoja kuja kutuita na kutupatia taarifa kuwa kuna watoto wamezama chini ya maji na hawaonekani. Tuliondoka na baada ya kufika kwenye bwawa la kuogelea ndipo tulipowaona wakiwa tayari wamekunywa maji mengi

anasema Florian.

Naye Goodluck anasema yeye na watoto wenzake zaidi ya 20 waliondoka Kijitonyama wakiwa na vijana wanne kwenda kwenye sherehe hiyo.

Tuliondoka hapa saa kumi na moja jioni, baada ya kufika kule tulianza kuogelea kwenye bwawa. Watoto wengine walikuwa wanakwenda kuogelea kwenye maji marefu, walizuiliwa mara tatu, lakini baada ya walinzi kuondoka walirudi na kuzama

anasema.

Kwa uchungu alionao Bahati Sisala alikuwa amekaa akiwa ameduwaa macho yake yamevimba na mekundu kutokana na machozi yaliyomtoka kwa muda mrefu.

Akiwa amejiinamia bado haamini mkasa uliomkuta binti yake kipenzi Ndimbumi Sisala (9) uliosababisha kifo chake ambacho kilimkuta ghafla katika hoteli hiyo Aprili 27.

Lugano Mwakyosi, ambaye ni msemaji wa familia hiyo inayoishi Kijitonyama Mpakani A, anasema Sisala amechanganyikiwa kutokana na kifo cha binti yake aliyempenda sana.

Baba yake haamini kilichotokea mpaka sasa. Alikuwa anampenda sana binti yake licha ya kwamba alikuwa wa mwisho kuzaliwa kati ya watoto wake wanne, Ndimbumi alikuwa binti wa pekee na tegemeo kubwa katika familia yake

anasema Mwakyosi.

Anasema Sisala alihojiwa na polisi kabla ya safari ya kwenda kuupumzisha mwili wa mwanaye mkoani Mbeya na kutoa tamko kwamba hana kinyongo na jirani yake akiamini kwamba ulikuwa mpango wa Mungu.

Baba mzazi wa marehemu amesema hana kinyongo na mzazi mwenzake kwani hakuwachukua watoto kwa nia mbaya, bali anaamini kwamba ni mpango wa Mungu japokuwa inamuuma sana kutokana na kufiwa na binti yake, aliyekuwa akisoma darasa la nne katika Shule ya Msingi Kijitonyama

anasema.

Sisala si mzazi pekee aliyefiwa katika mtaa huo. Devotha Mbutwa ni mzazi mwingine aliyepoteza mtoto wake, Janeth Kihoko  (9) aliyekuwa akisoma  Shule ya Msingi Dk. Omary Ali Juma darasa la nne.

Mbutwa anasema siku ya tukio watoto wake walimpigia simu wakiomba ruhusa ya kwenda kwenye sherehe hiyo na baadaye wangekwenda ufukweni.

Niliwakatalia, lakini wakanipigia tena na tena. Niliwaruhusu baada ya kuniambia kwamba wangekwenda hotelini tu bila kupita ufukweni. Kilichonishangaza baadaye nilipigiwa simu na kupewa taarifa za kifo cha binti yangu

 anasimulia kwa majonzi.

Mama huyo anasema hakukuwa na taarifa zozote alizopewa na jirani yake kuhusu sherehe hiyo. Mwili wa Janeth ulipumzishwa Jumatano katika Kijiji cha Viwengi, Wilaya ya Kilolo, Iringa.

Akitoa ushuhuda wa tukio hilo, Nicholaus Mwakatobe, baba mzazi wa marehemu Eva Mwakatobe (11), aliyekuwa akisoma darasa la tatu katika Shule ya Msingi Shekilango, anasema: 

Mpaka saa hii sijaona polisi wakinihoji wala kufika kumhoji yule mama, bado yupo hapa mtaani na aliwachukua watoto bila idhini ya wazazi.

Daria Andrew, bibi wa marehemu Eva, anasema mjukuu wake aliaga anakwenda kwenye sherehe ya kuzaliwa, lakini hakutarajia kama hayo yangetokea.

Alichukuliwa hapa kama anakwenda kwenye sherehe ya kuzaliwa huyo mtoto wa jirani yangu, aliniarifu wiki moja kabla wakati wa sherehe ya Pasaka, nilidhani ingekuwa salama japokuwa sikumruhusu kwenda kuingia katika maji

anasema Daria.

Hali ilivyokuwa mtaani

Vilio na simanzi vilitawala katika Mtaa wa Kijitonyama Mpakani A  kutokana na nyumba tatu za waumini waliokuwa wakisali Jumuiya pamoja kuwa na msiba.

Hali hiyo iliwalazimu majirani kuzunguka kutoka nyumba moja baada ya nyingine wakiwa na nia ya kuwapa moyo na kuwafariji wafiwa. 

Kama unavyoona, tangu usiku wa jana tunazunguka nyumba moja baada ya nyingine. Tunakaa hapa kwa Mwakatobe kwa muda mfupi na baadaye tunaondoka na kwenda nyumba nyingine, hii yote ni katika kuwafariji wafiwa. Ni msiba mzito sana na haijawahi kutokea katika mtaa wetu

anasema Jamila Husein mkazi wa Mpakani A.

Anita Mboka, mama anayedaiwa kuwachukua watoto hao hakupatikana baada ya kujifungia nyumbani kwake na majirani walisema ni kutokana na hofu ya msiba huo.

Alipopigiwa simu, ilipokelewa na mtu mwingine aliyesema kuwa mama huyo asingeweza kuzungumza kwa kuwa hali yake haikuwa nzuri.

Meneja wa Hoteli ya Landmark, Moshi Mbully anasema vifo vya watoto hao ni ajali iliyotokea ghafla kwani mabwawa ya kuogelea huwa na walinzi wawili mpaka watatu.

Tunasikitika sana kutokana na ajali hii. Tunafuatilia kwa ukaribu msiba huu na tayari tumeshakutana na familia zote tatu. Mbaya zaidi watoto walikatazwa zaidi ya mara tatu wasielekee eneo lenye maji mengi lakini kwa bahati mbaya walikaidi

 anasema Mbully.

Kamishna wa polisi  Kanda ya Dar es Salaam, Suleiman Kova anasema baada ya watoto hao kuopolewa na kupelekwa Hospitali  ya IMTU iliyopo Mbezi  walikuwa tayari wameshafariki dunia na hivi sasa bado uchunguzi wa vifo hivyo unaendelea.

Kutokana na uangalizi hafifu katika hoteli mbalimbali hapa nchini, Kamanda Kova anasema jeshi lake kwa sasa limejipanga kufuatilia kila hoteli ili kubaini kama ina wasimamizi wa mabwawa hayo ili kuokoa maisha ya watu.

Tukio hili linanisikitisha sana hasa ukizingatia hawa ni watoto wa taifa la kesho, na hii inaonyesha kuwa mabwawa mengi ya kuogelea hayana wasimamizi hivyo kuwa rahisi kwa watoto kuingia na kuogelea. Kungekuwa na wasimamizi vifo vya watoto hao visingetokea. Kutokana na uzembe huu jeshi langu litafanya utaratibu wa kukagua kila hoteli yenye bwawa la kuogelea kuhakikisha linakuwa na msimamizi,” anasema Kova. Sheria za umiliki wa mabwawa ya kuogelea inataka kuwepo kwa walinzi wakati wote, na hii ni katika mabwawa ya wakubwa na yale ya watoto.

Ajali za aina hii zimekuwa zikitokea mara kwa mara hali inayoashiria kuwa miongozo hii haifuatwi. Ili kupunguza ajali na kuokoa maisha ya watu, ni lazima wasimamizi wa miongozo hii watimize wajibu wao.