WATANZANIA WATAKIWA KURUDISHA MAGARI YA TOYOTA KIWANDANI

Wamiliki wa magari ya Toyota nchini wametakiwa kuhakiki magari yao na kuyarejesha kwa uchunguzi yale yatakayobainika kuwa na hitilafu za kiufundi katika mfumo wa baadhi ya vifaa vyake.

Taarifa ya Toyota Tanzania kwenye vyombo vya habari ilieleza jana kwamba magari yanayohusika ni RAV 4, Hilux na Fortuner yaliyotengenezwa kati ya mwaka 2006 na 2010.

Hatua hiyo imekuja baada ya Mkurugenzi Mtendaji wa Toyota Tanzania, Yusuph Karimjee kueleza mwishoni mwa wiki iliyopita kwamba ofisi yake inafanya tathmini baada ya kampuni hiyo yenye makao yake Japan, kuamua kurejesha magari hayo baada ya kubaini matatizo ya kiufundi.

Imesema wamiliki watakaohakiki magari yao na kubaini hitilafu, yatafanyiwa matengenezo bure Dar es Salaam, chini ya wataalamu wake.

Taarifa hiyo ilisema wateja wote watakaobaini hitilafu katika magari hao wataarifiwa jinsi ya kupatiwa huduma hiyo.

Hatua hiyo inatokana na kubainika kwa matatizo katika nyaya zilizounganishwa na mifuko ya hewa kwa ajili ya kuokoa maisha wakati wa ajali, kwenye magari hayo.

Kutokana na muundo na eneo ulipowekwa mfumo wa nyaya zinazoendesha mifuko ya hewa, hasa upande wa dereva, imeelezwa kwamba kunaweza kuwa na athari iwapo usukani utapata hitilafu wakati wa ajali.

Iwapo mfumo huo utaathiriwa, taa ya tahadhari inaweza kuwaka na kuathiri mfuko huo kwa upande wa dereva na kuufanya ushindwe kufanya kazi kama ilivyopangwa.

Hata hivyo, kampuni hiyo ilisema katika taarifa yake kuwa haijapokea taarifa ya ajali yoyote duniani iliyotokana na hitilafu hiyo.