WAKIMBIZI 82 WATIMULIWA NCHINI

Serikali ya Kenya imewatimua wakimbizi 82 kutoka Somalia ambao walikuwa nchini humo kinyume cha sheria. Waziri wa Mambo ya Ndani Kenya Joseph Ole Lenku amesema Wasomali hao wamerejeshwa Mogadishu na kwamba wahamiaji haramu wapatao 472 bado wanashikiliwa na polisi kufuatia oparesheni ya hivi karibuni ya usalama nchini humo. Ole Lenku amesema sheria imefuatwa katika oparesheni hiyo kwani Wasomali wote waliotimuliwa wamepelekwa Mogadishu leo asubuhi wakiwa wameandamana na Balozi wa Somalia nchini Kenya. Hapo jana Shirika la Umoja wa Mataifa la Kuwahudumia Wakimbizi UNHCR lilielezea wasi wasi wake kuhusu kutiwa mbaroni idadi kubwa ya wakimbizi Wasomali katika mji mkuu wa Kenya, Nairobi. Katika taarifa, UNHCR ilisema wakimbizi Wasomali wanaoshikiliwa wanapaswa kulindwa na kutokamatwa kiholela. Waziri wa Mambo ya Ndani wa Kenya Joseph Ole Lenku amenukuliwa akisema zaidi ya watu 4,000 wamekamatwa katika siku za hivi karibuni. Vikosi vya usalama Kenya vinatekeleza oparesheni kubwa ya kiusalama yenye lengo la kuwasaka magaidi kufuatia hujuma za kigaidi katika miji ya Nairobi na Mombasa. Kundi la kigaidi la Al Shabab limenukuliwa mara kadhaa likisema litatekeleza hujuma Kenya kulipiza kisasi uingiliaji wa jeshi la Kenya nchini Somalia.