UGOMVI WA WAZEE WAUA MTU MBEYA

Mzee wa miaka 70 amefariki dunia jana saa 6:30 usiku katika hospitali ya wilaya ya Kyela mkoani Mbeya baada ya kupigwa na jiwe mbavuni.

Mzee Aron Msole, 70, Mndali, Mkulima na mkazi wa kijiji cha Ibanda alikutwa na umauti akiwa hospitalini kwa ajili ya kupata matibabu baada ya kupigwa na jiwe mbavuni na mtuhumiwa aliyefahamika kwa jina la Anania Simtoe, 50,Mnyamwanga, mkulima na mkazi wa Ibanda.

Chanzo cha tukio hulo kimefahamika kuwa ni ng’ombe wa mtuhumiwa kuingia katika shamba la marehemu na kuharibu mazao kitu kilichopelekea ugomvi uliosababisha mauti ya marehemu. Mwili wa marehemu umekwisha fanyiwa uchunguzi na kukabidhiwa kwa ndugu tayari kwa mazishi.

 Kamanda wa polisi mkoa wa Mbeya na kamishna msaidizi wa jeshi la polisi Diwani Athumani amethibitisha kutokea kwa tukio hilo na habari toka kwa maafisa wa polisi zinasema kuwa mtuhumiwa amekwisha kamatwa na makachero wa polisi wakati taatibu za kumfikisha mahakamani zikiendelea.

Pamoja na hayo Kamanda Diwani Athumani ametoa wito kwa jamii kutatua matatizo au migogoro yao kwa njia ya kukaa meza ya mazungumzo ili kuepuka matatizoyanayoweza kuepukika.