SIMBA YATAMBA KWA SC VILLA YA UGANDA

Timu ya Simba imeshinda mechi yao dhidi ya timu ya SC Villa ya Uganda kwa mabao 4-1 katika mchezo wa kirafiki wa kimataifa uliochezwa kwenye Uwanja wa Taifa, Dar es Salaam.

Mashujaa wa Simba katika mchezo huo walikuwa ni viungo, Jonas Mkude, Willium Lucian na Betram Mombeki akipachika mabao mawili huku bao la kufutia machozi kwa SC Villa likifungwa na Ronald Mganga.

SC Villa ilianza mchezo vizuri na kupata bao la kwanza katika dakika ya tisa lililofungwa na Mganga akiunganisha kwa shuti kali krosi ya Sijar Jamal iliyoshindwa kuokolewa na mabeki wa Simba.

Baada ya bao hilo, Simba waliamka na kufanikiwa kusawazisha goli hilo kupitia kiungo Mkude ambaye alifunga bao hilo kwa shuti akiwa nje ya eneo la 18 baada ya kupokea pasi ya Amri Kiemba.

Kiungo Lucian aliyeingia kuchukua nafasi ya Humud alipatia Simba bao la pili katika dakika ya 54 kwa shuti la umbali wa mita 26 akimalizia pasi ya Kiemba.

Mshambuliaji Mombeki alipachika bao la tatu katika dakika ya 70, akimalizia mpira wa adhabu uliopigwa na Said Ndemla na kugonga mwamba na kumkuta mfungaji.

Dakika tatu baadaye Mombeki alipachika bao la nne akiunganisha krosi ya Nassoro Masoud Cholo.

Nayo Coastal Union ililazimishwa suluhu na Three Pillars kwenye Uwanja wa Mkwakwani.

Mabingwa wa Tanzania Bara, Yanga, leo watashuka dimbani kumenyana na Waganda hao kwenye Uwanja wa Taifa.

Yanga inajiandaa na mechi yao ya Ngao ya Jamii dhidi ya Azam ambayo inajifua Afrika Kusini.

Kingilio katika mchezo huo ni VIP Sh20,000, VIP B Sh15,000, VIP C Sh10,000, wakati viti vya rangi ya machungwa, bluu na kijani ni Sh5,000.