RAGE AMTAKA ANGETILE OSIA KULIACHA SUALA LA MRISHO NGASSA

Mwenyekiti wa Simba, Ismail Aden Rage amemtaka Katibu Mkuu wa TFF, Angetile Osiah kuacha kuzungumzia suala la Mrisho Ngassa na badala yake aiache Kamati ya Sheria, Haki na Hadhi ya wachezaji ifanye kazi yake na kutoa uamuzi kwa haki.

Kauli ya Rage imekuja ikiwa ni siku moja baada ya Osiah kukaririwa na Star TV akisema viongozi wa Simba na Yanga wamekuwa wakifanya usajili kwa kukomoana.
“Simba na Yanga wamekuwa wakifanya mambo kwa kukomoana, kama hili mchezaji alishaonyesha wazi hahitaji kuchezea klabu yako kwa nini umng’ang’anie kumsajili, mchezaji kama hataki kucheza klabu yako achana naye toa nafasi kwa wachezaji wengine, wao wanafanya hivi halafu baadaye waangushe lawama kwa TFF wanapendelea klabu fulani, kamati itakaa na klabu anayostaili Ngassa kuchezea basi ataidhinishwa huko.
Hata hivyo Simba imesema haipo tayari kumng’ang’ania mchezaji huyo iwapo Yanga itatoa kitita cha Sh150 milioni, lakini si chini ya hapo na kwamba wao wana mkataba na Ngassa ambao utamalizika Mei mwakani.
Mwenyekiti wa Kamati ya usajili ya Simba Zakaria Hans Pope alisema “Mkataba wetu na Ngassa upo wazi tena unasema wazi utaanza pale ambapo mkataba wake na Azam utakapomalizika, hatujaingia mkataba juu ya mkataba kama Yanga wanavyodhani na tuliupeleka TFF toka Desemba mwaka jana.
Ngassa amejikuta kwenye mgogoro wa usajili ambao hatima yake itaamuliwa Jumanne ijayo na Kamati ya Alex Mgongolwa .