MUTHARIKA KUWEKA UBIA NA NCHI ZA MAGHARIBI

Rais mpya wa Malawi, Peter Mutharika, aliyeapishwa kuingia rasmi madarakani hapo jana amesema nchi sasa itatafuta marafiki wapya katika kuisadia nchi hiyo. Amesema nchi hiyo ambayo imekuwa siku zote ikizitegemea nchi za Magharibi kwa ufadhili itabadili mwelekeo na kuzijongelea China na Urusi. Mutharika aliitoa kauli hiyo katika sherehe za kuapishwa kwake zilizosusiwa na rais aliyeondoka madarakani, Joyce Banda, baada ya kushindwa katika uchaguzi huo uliozusha utata. Mutharika aliyeingia madarakani katika nchi hiyo ambayo ni miongoni mwa nchi masikini kabisa duniani ambako asilimia 40 ya bajeti yake inatokana na msaada wa wafadhili amesema nchi wafadhili zinakaribishwa kubakia Malawi. Hata hivyo rais huyo amebaini kwamba sera za kigeni za taifa hilo zitazingatia maslahi ya nchi hiyo huku akiweka wazi kwamba uhusiano uliokuwepo awali utaendelea. Uingereza na Marekani zimetoa ahadi ya kushirikiana na serikali hiyo mpya ya Mutharika. Aidha rais huyo wa Malawi amezungumzia kusikitishwa kwake na hatua ya rais aliyeondoka madakani, Joyce Banda, ya kukataa kufika kumkabidhi madaraka ingawa kwa upande mwingine msemaji wa Bibi Banda amesema kiongozi huyo hakualikwa rasmi katika sherehe hizo na juu ya hilo aliondolewa msafara rasmi unaoandamana na rais punde baada ya Mutharika kutangazwa mshindi wa uchaguzi wa rais siku ya Jumamosi.