BALOZI ZA MAREKANI KUFUNGWA MPAKA AGOSTI 10

Wizara ya mambo ya nje ya Marekani, imesema kuwa balozi zake katika miji 19 ya Mashariki ya Kati pamoja na Afrika, zitaendelea kufungwa hadi tarehe 10 ya mwezi huu wa Agosti.


Balozi hizo zitafungwa kutokana na kuwepo taarifa kwamba mtandao wa kigaidi wa Al-Qaeda unaweza ukazishambulia balozi hizo.
Msemaji wa wizara ya mambo ya nje ya Marekani, Jen Psaki, amesema kuwa uamuzi wa kuzifunga balozi hizo hadi Jumamosi ijayo, unatokana na kile alichokiita kuchukua tahadhari na sio kwamba pametolewa vitisho vipya vya kufanyika kwa mashambulizi mengine.

Mmoja wa viongozi wa Al-Qaeda, Said al-Shihri

Psaki, amesema kuwa hatua hiyo ni kwa ajili ya kuwalinda wafanyakazi wa balozi hizo wakiwemo wale wa Marekani na raia wa nchi husika pamoja na kuwalinda wageni wanaozitembelea balozi hizo.

Amesema kuwa balozi zitakazoendelea kufungwa ni pamoja na zile zilizoko kwenye miji ya Abu Dhabi, Amman, Cairo, Riyadh, Dhahran, Jedda, Doha na Dubai. Balozi nyingine ni zile zilizopo, Kuwait, Manama, Muscat, Sanaa, Tripoli, Antananarivo, Bujumbura, Djibouti, Khartoum, Kigali na Port Louis.