MZAZI ACHARAZA VIBOKO WAALIMU WAWILI, KISA KIKO HAPA

Vitendo vya baadhi ya wazazi, kudhalilisha walimu vinaendelea, ambapo mzazi mmoja Selemani Juma, amewashambulia walimu wawili kwa viboko.

Amefanya hivyo kupinga mwanawe kurudishwa nyumbani, akashone kaptura. Alifanya hivyo mwishoni mwa wiki iliyopita.

Taarifa zilizotufikia zilibainisha kuwa Juma alidhalilisha walimu wawili wa Shule ya Msingi Nzogimlole iliyopo wilayani Nzega mkoani Tabora. Aliwashambulia kwa viboko, akipinga kitendo cha mwalimu mmojawapo, kumrudisha nyumbani mwanawe.

Tulifika katika shule hiyo, yenye walimu tisa tu na kuzungumza na Mwalimu Mkuu Msaidizi, Emmanuel Josephat, ambaye alisema mwanafunzi huyo, Shaaban Maziku anayesoma darasa la pili, alipeleka ujumbe tofauti na alioagizwa na walimu kwa baba yake, hivyo kusababisha kadhia hiyo.

Kwa mujibu wa Mwalimu Josephat, mwalimu aliyedhalilishwa (jina limehifadhiwa), alikuwa akifundisha katika darasa hilo na alipomuona mwanafunzi huyo kavaa kaptura iliyochanika vibaya, kiasi cha sehemu za siri kuonekana, alimrudisha nyumbani kwenda kurekebisha sare yake.

Mwalimu Josephat alisema mwalimu huyo wa kiume wa darasa la pili, alimwagiza mwanafunzi wake aende kwa baba yake, akamuombe amsaidie kushona kaptura hiyo.